Täze kitap!

”Gün” neşirýatynda ussat türkmen ýazyjysy, Magtymguly adyndaky döwlet baýragynyň laureaty Tirkiş Jumageldiniň ”Gorky belasy” atly täze kitaby çykdy. Bu kitaba ýazyjynyň soňky ýyllarda döreden iki eseri - "Gorky belasy" atly romany we "Ömürzaýa" powesti - girizildi. 23-26-njy sentýabrda Şwesiýanyň Göteborg şäherinde geçýän Halkara kitap ýarmarkasynda bu kitabyň tanyşdyrylyşy bolar. Biz Ýewropada, aýratynam Şwesiýada ýaşaýan türkmen okyjylaryny Halkara kitap ýarmarkasyna gatnaşmaga we ”Gün” neşirýatynda çap edilen täze türkmen kitaplary bilen tanyşmaga çagyrýarys!

Tirkiş Jumageldi. Gorky belasy: roman we powest. – Stockholm: ”GÜN” neşirýaty, 2010. – 382 s.

 TIRKIŞ JUMAGELDI, türkmen ýazyjysy, Türkmenistan Ýazyjylar guramasynyň agzasy, ýigrimiden gowrak edebi-çeper kitaplaryň awtory; türkmen dilinde ýazýar.

Ussat türkmen ýazyjysy, Magtymguly adyndaky milli edebi baýragyň laureaty Tirkiş Jumageldiniň bu kitabyna onuň soňky ýyllarda döreden iki eseri girizildi.

                      ”Ömürzaýa” eseriniň baş gahrymany, oba gelni Altynyň obrazy arkaly ýazyjy geçen asyryň ortalarynda türkmen milli ahlagynyň öňünde keseren ýiti soraglara jogap agtarsa, ”Gorky belasynda” türkmen jemgyýetiniň şu günki duçar bolan kynçylyklaryny döwürdeşlerimiziň ykbalynda howsalaly jikme-jikliginde açyp görkezýär.

                      Dürli döwürlerde öz öňünden çykýan global soraglara türkmen jemgyýeti degerli jogap tapyp bilýärmi? Halkyň milli ahlagy, milli aň-düşünjesi durmuşyň jogapkärli öwrümlerinde duşýan agyr synaglara näderejede hötde gelýär? Ine, bu kitaby eline alan okyjylaryň ýüzbe-ýüz bolýan soraglary.

”Gün” neşirýaty