ONJUGYŇ BOÝNUNA MONJUK!

(Onjuk Musa we beýleki ýaranjaňlara bagyşlanýar)

Adama meňzeýäň,
Geýinýäň eşik.
Emma seň ynsabyň
Eleme-deşik!

Häkimi öwýärsiň,
Bileňok çakyn.
Mugt däl. Iýmek üçin
Il-günüň hakyn.

Sende ar-namys ýok,
Guwanýaň ada.
Janyň hökümdara
Berdiň öň wada.

Ezraýyl gapyda
Tüýdük çalanda,
Onjuk, sen nirdediň
Ajal gelende?!

Serdar öldi, a sen
Ýaşap irmediň!
Nämüçin oň bilen
Gabra girmediň?

Haçana çen beýdip,
Ölüm toýlajak?
Sen ýene näçeräk
Serdar jaýlajak?..

Mende bir teklip bar,
Il-halk oňlasa,
Ýaşuly, ýaşkiçi
Sözüm diňlese…

Onjugyň haky ýok
Beýdip ýörmäge –
Serdaryndan galyp,
Döwran sürmäge!

Goý, indi ol bu gün
Özünden görsün:
Hindi zenany dek
Sözünde dursun.

Hindide är ölse,
Serdar mysaly:
Bir nöker ýakylýar,
Birem – aýaly…

Ýöne biz rehimli,
Däbe bendi däl:
Onjugam hindi däl,
Bizem hindi däl!

Onjuk Musaýeve
”Sagbol” aýdalyň.
Biz ony Gypjakda
Goýup gaýdalyň!