Şwesiýanyñ Göteborg şäherinde 25-28 sentýabr aralygynda nobatdaky Halkara kitap ýarmarkasy bolup geçdi. Kitap ýarmarkasyna bu ýyl 30 ýurtdan ýüzlerçe neşirýat, 788 ýazyjy-şahyr gatnaşdy, 800-den gowrak sergi, 435 seminar gurnaldy.

Bu ýyl Latyş edebiýaty Halkara kitap ýarmarkasynyñ hormatly myhmany boldy. Latyş neşirýatlaryna, ýazyjy-şahyrlaryna has uly üns berlip, şwed we iñlis dillerinde olar hakda aýratyn köp maglumat ýaýradyldy. Ol ýerden bu ýyl 24 ýazyjy-şahyr Halkara kitap ýarmarkasyna gatnaşyp, dürli temalardan çykyş etdiler.

Latyş edebiýatynyñ kitap ýarmarkasyndaky günlerini Latviýanyñ medeniýet ministri açdy hem Latviýada kitap çap etmek, edebiýaty we edebiýat wekillerini, medeniýeti goldamak üçin soñky ýyllarda durmuşa geçirilen işler barada gürrüñ berdi. Ýöne iñ gyzykly çykyşlary, elbetde, latyş ýazyjylary etdiler. Olar garaşsyzlyk alnandan soñ Latyş edebiýatynyñ we medeniýetiniñ öñünde keseren agyr problemalar hem olaryñ uzaga çeken çözgütleri hakda gürrüñ berdiler. Ýöne barybir latyş ýazyjy-şahyrlary öz çykyşlarynyñ agramly bölegini edebiýatyñ öz problemalaryna syrykdyryp, esasan bu ugurdan gürrüñ etdiler.

Göwnüme bolmasa, bu ýyl ýarmarka gelenler kitap satyn almaga ozalkylardanam has höwesek boldular. Bu ýere gelen kitap söýüjileriñ eli kitapsyzyny görmek kyndy, käbirleri bolsa, täze çykan kitaplardan hut ýüklenip gidýärdiler.

Kitap ýarmarkasynda asly Owganystanly amerikan ýazyjysy Haled Husseýniñ ”Batbörek” romany örän köp satyldy. Sowet basybalyşyndan soñra owgan halkynyñ başyndan inen agyr tragediýany anyk adam ykballarynyñ üsti bilen diýseñ çeper açyp görkezýän, Owganystandaky azlykda ýaşaýan milletleriñ, şol sanda hazarylaryñ ikitaraplaýyn ezilişini bassyr-ýussursyz paş edýän bu roman häzir dünýäde iñ köp okalýan kitaplaryñ biridir.

Halkara kitap ýarmarkasynda ”Gün” neşirýatyna-da beýleki neşirýatlar bilen peýdaly aragatnaşyklary açmak, öz çap edýän kitaplary bilen okyjylary tanyşdyrmak miýesser etdi. Bu tanyşlyklaryñ neşirýatyñ işi üçin geljekde örän peýdaly boljakdygyna ynam bar.

Kitap ýarmarkasy döwründe, has takygy 25-26-njy sentýabrda, agşamlaryna, ozaldan göz öñünde tutulyşy ýaly, Türkmen dilinden okuw sapaklary-da geçirildi. Oña Göteborg şäherinde ýaşaýan türkmenleriñ birnäçesi gatnaşdylar.

Biz size Halkara kitap ýarmarkasyndan birnäçe suratlary hödürleýäris.

A.Welsapar, ýazyjy