|
– Диктофон диңләп гөрҗекми,
гелнеҗе? – дийип, йүвүрҗиси Мырат Айҗерене йүзленди.
Мырат дөвлет ховпсузлык комитетинде ишлейәрди.
– Нәме язылан онда? Ханы, диңләерис, диңлетсең – дийип, Айҗерен өй
ишлери билен гүмра болуп йөршүне, о диен бир гызыкланып дурман, йүзугра
җогап берди.
Мырат диктофоны ишледип гойберди. Шонда диктофондан: «Рус базарыны
отлапдырлар, Чәрҗевде «Дүнйә базары» хем отланыпдыр. Бу янгынлар йөне
ерден дәл. Кимдир бири йөрүте гурнапдыр, өзи хем президент сапара гиден
вагты отлапдырлар» диен сөзлер эшидилип башланды...
Айҗерен йүвүрҗисинден ол сеси нәме үчин яздырандыгыны соранда, Мырат:
«Бизе шейле гөркезме берилди. Бизиң ишгәрлеримиз граҗдан эшигине гирип,
илиң арасында гезйәрлер. Габадына гелсе, адамларың сеслерини яздырярыс.
Бизиң штатдакы ишгәрлеримиз хем, штатдан дашары ишгәрлеримиз хем шол иш
билен мешгул болярлар: тойларда, худайёлыда болуп, геп диңлейәрис. Шулар
ялы язгыны ресми кагызың янына гошуп, дерңеве берйәрис, онсоң сеси язылан
адамың гаршысына җенаят иши гозгаляр» дийип, Мырат гелнеҗесине, хамана,
говы иш эдйән ялы гүррүң берди.
– Хайсы мадда боюнча җенаят ишини гозгаярсыңыз? – дийип, Айҗерен бираз
геңиргенди.
Шонда Мырат:
– Гелнеҗе, нәме Җенаят кодексинде мадда гытмы? Эсасы зат адам тапмак.
Мадда мыдама-да тапыляр, 5-3 гүн ерземинде уруп-енҗип сакласаң, адам әхли
зады боюн аляр – дийип, Мырат первайсыз нокгулдады.
Шондан соң Айҗерен гусса батды. Онуң отурып-туруп, карары етмеди. Ол
йүвүрҗисине йүзленип:
– Мырат җан, җигим, мениң айданымы этсең, шол язгыны хич ере гечирме.
Оны ёк эт. Эгер болян болса шейтсене. Ол адамың хем чагалары бардыр. Ол
чагалар экленҗе гарашып отурандырлар – дийди. – Гайрат эт, җигим, гелнеҗең
сөзүни йыкма.
Мырадың кейпи гачды:
– Боляр-да... Йөне индики гезек саңа язгы диңлетмен – дийип, ол
нәгилелик билен разы болды.
Шейдип, Айҗерен бир раятымызы дөвлетиң послы, йөне рехимсиз юридики
машынының нәсаз ишлейән чархларының ашагындан алып галды. Ёгса, ол эйменч
чархлар, нәмәниң нәмедигине гөз етирмезден, бу гүн ене бир бигүнә бендәниң
үстүнден йөрәп, онуң сүңклерине ченли күл-оврам этҗекди. |